الدايت و التنمية الذاتية ✪للناس العادية✪ |✯بالفيديو | DAfnasha.com ➤ دفنشَة.كوم
Share on facebook
Facebook
Share on twitter
Twitter
Share on linkedin
LinkedIn
Share on whatsapp
WhatsApp

البنات و الجِنـان عند فِكرة التمرين بالأوزان (بِالرٌاحة!)

في البوست دة هنناقش سببين رئيسيين اللي دفعوا كتير من البنات إنٌهم يفكِســوا لفِكرة التمرين بالأوزان وافتكروا إنٌه التمرين بالأوزان أو تمرين المقاومة بشكل عام مينفعش ليهم بالذٌات و والواحدة منهم بتعمل دايت وبنوضح إزاي من غيره مُستحيل جسمك يكون مفرود زي ما بتتمني.

في بوست سابق (تصحيح المفاهيم) اتكلٌمنا عن أهمية التَمرين بالأوزان مع الدايت في نفس الوقت علشان تكون الخسٌية اللي الواحد بيخسٌها من الدايت تبقى من وَزن الدهون صافي, وإلا الدايت هيحرق من الفريم العضلي للجسم و بالتالي الواحد بدل ما يبقى جسمه بينشف, يلاقي نفسه بيخسٌ على الميزان و جسمه بيرهرَط.

في البوست دة هنناقش سببين رئيسيين اللي دفعوا كتير من البنات إنٌهم يفكِســوا لفِكرة التمرين بالأوزان وافتكروا إنٌه التمرين بالأوزان مينفعش ليهم بالذٌات و والواحدة منهم بتعمل دايت. وبالتالي صار الــ “كارديــو” (تريدميل, عجلة … إلـخ) نوع الرياضة الأول و الأساسي للكثير ظنٌاً إن دة في صالح الحصول على الجسم المتقسٌـِم, الـ Toned أو المَفرود اللي هو مَسعى الكثير منهم. وهنعرف ليه التمرين بالأوزان مُرتبط Automatic في أذهان الكثير بإنٌه بيسبب زيادة في الوَزن وبالتالي انتشرت فِكرة إنٌه لازم يتفكسله على الدايت -_-!

1) الإهتمام المُبالغ بــــــ”وزن الميــزان”.

بتقيسي وزنك كل يوم ؟ .. بتقيسي وزنك أكتر من مرٌة في اليوم وبعد أي وجبة فري أو Cheat Meal ؟

مبــروك … دة اسمه “جـنان برُخصـة” ^^!

البنات أكثر هوساً من الرجال في الإرتباط عاطفياً بـ رقـم أو وَزن الميـزان. بَل إنٌ منهم (عينٌة) اللي ممكن يوصل الأمر معاها إلى إنٌها تقيس وزنها ليل-نهار, أكتر من مرٌة في اليوم, على مَدار اليوم, بَعد كُل أكلة. و أنا شخصياً زمان مكنتش بعيد عن الكلام دة وأنا صغير أيام لمٌا كان وَزني زايد و بصارِع موضوع فُقدان الوزن.

– – – – – – – – – – – – – – – – – – – – – – – – – – – – – – – – – – – – – – – – – – – –

مُستحيل .. مُستحيل تقدٌري تثبٌتي رقم مُعٌـيـَن ليكي على الميـزان ! افكِسي لفِكرة الوَزن المثالي أو الرقَم المثالي.

– – – – – – – – – – – – – – – – – – – – – – – – – – – – – – – – – – – – – – – – – – – –

لازم تعرفي إنٌه وزن الميزان “هيفضل” دائماً و ابداً و Forever ! يطلَع و ينزِل كُل يوم -وأكتر من مرٌة في اليوم!- على حسب كمٌية وافِرة من العوامِل يَصعُب حصرها كلٌها, منها:

  • انتي شاربة ولٌا مش شاربة ؟ (شاربة ميٌة يعني -_-)
  • سِبتي نفسِك مَزنوقة ومدخلتيش الحمٌام لفترة ؟ -_-
  • واكلة ولا مش واكله ؟
  • كان فيه ملح زيادة في وجباتك و أكلك انهاردة عن المُعتاد ؟ (دة هيسبٌب اختزان وزن ميٌة زيادة مؤقت)
  • طَب أكلك للملح بقى أقل عن المعتاد ؟ (فقدان وزن ميٌة)
  • أكلتي نشويات زيادة انهاردة ؟ (زيادة وزن ميٌة لأن جُزء من الكربوهيدريت بيتخزٌن في الجسم و العضلات وبيسحب معاه وَزن ميٌة داخل الجسم).
  • طَب شيلتي النشويات انهاردة ؟ (يبقى هتسخٌي وزن ميٌة).
  • عندك Stress بزيادة عَن المُعتاد ؟ دة هيزٌود هرمون الـ Cortisol اللي بيرفع من اختزان الميٌة تحت الجلد و اللي بيزيد أكتر و أكتر مع الدايت القاسي لمٌا الواحد بيقلل أكله قوي وبالتالي وزنك على الميزان رقمه هيفضل يزيد وانتي فاكرة إنٌك بتتخني ودة كلٌه وَزن ميـٌة.

و إلــخ من الهواجِس اللي بتدفع أغلب من يرتبط بوزن الميزان للإستسلام !

– – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – –

.. قـاعـدة ..

اللي بيهتم بوزن الميزان و “مَهوُوس” بيه مُش هيوصل للجسم المتقسٌـِم, المَفرود, أو الناشف إلا بصعوبة بالغة !

الميزان ما هو إلا “رقم تقريبي”, استخدامه الأساسي إنٌك توزني نفسك قبل الدايت عشان تحسبي وزنك وتشوفي -تقريباً- محتاجة كام كالوري تبدأي بيهم على الدايت بتاعك وسلام عليكم. بعد كدة اعتمادك لقياس نتايجك وتطوراتك يبقى على “الصـور” كُل اسبوعين تلاتة في الدايت (صورٌي نفسك في نفس الإضاءة, نفس المكان, نفس الأوضاع, بدون اللبس) و قياسات الوِسط بمازورة و “المرايا” بشكل أساسي.

الإرتبـاط بوزن الميزان هو المُسبٌــِب الرئيسي للجـنـان ! .. و تَرك فِكرة الـ دايـت و الإستـسلام !

والسبب إنٌك لازم تغٌيري أدوات قياس نجاحك على الدايت إنٌه الميزان عمره مهيقولٌك ابداً ابداً انتي الوزن اللي بتزيديه وبتخسيه هو (وزن ميٌة ؟, وزن عضل ؟, ولٌا وزن دهون ؟). دة غير إختلاف القراءات بين كُل ميزان و التاني, حتٌى الـ Digital منهم بيبقى غير مَظبوط بالمرٌة (بالظٌبط زي اجهزة قياس الضٌغط الديجيتال).

صورة بتوضٌح الفرق بين نُص كيلو دهــون .vs. نُص كيلو عـضـل. الدهون حجمها أكبر (نافِـش اكتر -_-) عن العضل في نفس الوزن! – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – –

علشان كِدة ممكن نجيب اتنين نفس الوزن و الطول, وواحد بكرش أو ببطن و التاني أو التانية ببطن مفرودة أو عضلات بطن. وعلى الميزان الإتنين نفس الطول و الوزن. لكن الـ Body Composition فَرق السما و الأرض.

دة غير وَزن الميٌة في جسمك اللي بيختلف على مدار اليوم من الصباح للمساء واللي هيجننك ويخلٌيكي تيأسي, وتروحي تضربي في الأكل اكتر من الأول و من قبل الدايت كمان o__o ! (أنا شخصياً ليٌا ذكريات بائسة مع الموضوع دة :@)

بعد كُل اللي فات و قلناه دة لأ بقى بيكدب ~_~ !

2) الخوف من الزيادة الـ Fake / الوهمية و المؤقتٌة x_x !

” أصل أنا لمٌا بنزل الجيٌم بلاقي نَفسي بقى يطلعلي عضل !!! O_O !!! “ ” شُفت واحدة صاحبتي راحِت الجيمٌ وشالت أوزان و وزنها زاد أكتر و طلعلها عَضَل !!! O_O !!! “

طبيعي لمٌا انتي بيكون عندك نسبة دهون في جسمك موجودة Already وبالذٌات لو نسبة دهون جسمك مُش قليلة (وأغلب الناس كدة في النُقطة دي) أول ما تشيلي أوزان هيبقى فيه ضَخٌ دموي أو Pump رايحة للعضلات دي واللي لسٌة مش متعودٌة على التمرين بالأوزان. والبامب دي لمٌا بتحصل شيء طبيعي إنها -وبالبلدي كِدة- هتــزؤ “اللَحم” أو الدهون اللي عندك لبرٌة أو لقُدٌام في البداية. ولو وزنتي نفسك على الميزان بعدها هتلاقي نفسك “زِدتٌي” وطبعاً هتتخضٌي! O_o. بس الزيادة دي مِش “تـُخن”! … Nope !

عضلات مُش مُستخدمة vs عضلات مُستَخدَمة مع التمرين.

الزيادة “الرقمية” اللي على الميزان دي بتحصل لأن ضَخٌ الدم اخلتف وبقى رايح للعضلات اللي اتمرٌنت واللي بدأتي تستخدميها, ولمٌا بتاكلي نشويات أو كربوهيدريت (عـادي, ومين مننا مُش بياكلها كل يوم ؟ ^^) جُزء منها بيبدأ يتخزٌن في العضلات على شكل “جلايكوجينٌ” (i.e. Glycogen) كمصدر للطاقة للعضلات. والجلايكوجين دة شيء طبيعي إنٌه بيسحب معاه “وزن ميٌـة” داخل العضلة نفسها. لكن كُل دة مُش وَزن دهـون أو تُخـن زي ما انتي فاكرة أو بتفتكري دايماً في البداية. لو صـَفٌيتي جسمِك من الدهون المُحطية بالفريم العضلي بتاعك عن طريق الـ دايـت, هتلاقي فعلياً إنٌ حـَجمك الصافي مُش كبير على الإطلاق زي ما انتي كنتي فاكرة نتيجة لأن عندك طبقة أو طبقات سميكة من الدهون Already مُحيطة بالفريم العضلي بتاعك.

ولذلك نرجع ونقول .. الميزان مُش مقياس على الإطلاق لأنٌه مُش بيحددلك زيادتك دي وَزن ميٌة ولٌا دهون ولٌا عضل, حتى لو الميزان Digital أو رقمي ابعَد مايكون من الصحة, والقراءات عليه هتختلف أكتر من الميزان العادي كمان!

– – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – البنتين اللي في الصورة دول -و زي كتير من البنات!- هيفتكروا إن مَنطقة الأرداف تحديداً عندهم كبيرة 0_0! أو هيفتِكروا إنٌ هيكَلهم عريض وهيخافوا يشيلوا أوزان. لكن بعد الدايت, حقيقة الأمر كان معظم الحجم دة “دهون”! ودة واضِح من الأرداف اللي اتصَـفٌـِت وبقت انشف. (كتير من حَجمك هيطلع دهون, مُش هيكَلِك الصافي الطبيعي).

اللي بيخلٌي البنات يفتكروا إنٌهم Bulky إنٌهم عندهم Already -ومن قبل ما يبدأوا دايت أو تمرين- نسبة دهون “عالية” في جسمهم مغطٌية العضل. لكن لو الدهون اللي في الجسم اتحرقت عن طريق الدايت (مع التمرين بالأوزان طبعاً), العضل و الهيكل الصافي هيطلع أصغر بكتير ممٌا كانوا يتوقعوا بعد تصفية الجسم من الدهون (الدهون بتُعطي سُمك و حَجم للجسم برضه, بس مُش بتبقى مُريحة في التحرك أو بدون اللبس زي الجسم الصافي -_-). – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – –

والجَدير بالذكر إنٌه في مقال (تصحيح المفاهيم) وضٌحنا سابقاً بالنسبة لموضوع تكبير العضلات إنٌه مش سهل قوي كدة بالنسبة للرجٌالة “الطبيعيين” في المقام الأول, واللي عندهم هرمون الذكورة (هرمون بناء العضلات الأول!) أكتر 10 أضعاف تقريباً عن اللي موجود عند الإناث. فأكيد انتي مش هتبقى Hercules لا في اسبوع, ولا في شَهر ^^!). وإلا مكنش حَد غِلـِـب !

| في النهــايــــة .. It’s Up to You !

جسمك مُش هيفضل كِدة ! .. إعرفي و توقعٌي إنٌك لمٌا تبدئي التمرين بالأوزان مع الدايت علشان تثبٌتي الفريم العضلي اللي عندك و تسيبي الدايت يحرق الدهون بشكل صافي, هتلاقي عضلاتك لازم طبيعي هَـتشِد في البداية ودة اللي بيحسسك إنٌك زِدتي. لكن لو صبرتي لعدٌة اسابيع من 4 لـ 8 (مع الدايت المظبوط!) هتلاقي اللحم و الدهون اللي كانت طِلعِت لبرٌة و بَـرَزت في الأول مع بداية التمرين بالأوزان دلوقتي بدأت تتحرق و تخِس عبر الأسابيع وهيبدأ جسمك واحدة واحدة مع مرور كُل كام اسبوع و من شهر للتاني يكشِف عن الفريم الصافي أو الـ Toned ليكي.

الموضوع يرجعلك في الآخر, بس لو انتي شايفة نفسك 10/10 😉 بالخسٌية العادية (يعني “دايت” فقط بدون تمرين بالأوزان) واللي بتنتهي دايماً بإن الواحد وزنه بيقل على الميزان و بيخِس وزناً لكن بيبقى Still عنده دهون, وجناب أو جسمه مش متقسٌم, مفرود, أو ناشِف. ممكن دة حلو طبعاً بالنسبالك كبنت, ولكن …

لازم تعرفي إن موضوع تصفية الجـِسم “ابسـَط” ممٌا تتخيلي, و إنٌك انتي -وأي حَد عادي- عنده و عندك الـ Potential والمقدرة إنٌك توصلي لجسم زي الـ Models, أو مايُعرف بالـ Beach Body فقط بإنٌك تبدأي تتمرنٌي بالأوزان كام مرٌة في الإسبوع مع “الدايت” السليم علشان تِدٌي حافز لجسمك إنٌه مايضٌحٌيش بالفريم العضلي بتاعِك وانتي بتخسٌي, وفي نهاية الدايت .. هتبقى زي الـ Models!, ولو شكلك “حـلـو” في لبس معٌين … دلوقتي “أي حاجة” عليكي مؤكٌـد هتبقى أحلى! … لأن مفيش ‘عيب’ مُعيٌن هتبقي بتحاولي تِداري عليه, ودة مؤكٌـَد هينعكِس بدرجة كبيرة على ثقتك في نفسك!

التمرين بالأوزان مُش هيخلٌي شكل جسمك زي “المُربـٌــَع” -__- ! الهيكل العضلي للبنات هيفضل شكله Curvy و مُنحني مقارنة بالرجال اللي بيتمرٌنوا بالأوزان. التمريبن بالأوزان بيعطيكي كامل التحكٌم لرَسم كُل منطقة في جسمك.

 

اترك تعليقك ..

عن دفنَشَة

دفنَشَة هو إتجاه حياتي شامل و فلسفة تسعى إلى التطوير الذاتي و الإرتقاء في مختلف جوانب الحياة مع الإحتفاظ بتبسيط الأمور و تيسيرها للجميع. يتخصص إتجاه دفنَشَة في الدايت و فقدان الوزن, البيزنيس, التسويق, السيكولوجي, و تبسيط هذه الجوانب المحورية التى تمس حياة كل شخص و الهام لكل شخص تطويرها على الصعيد الشخصي ليحظى بحياة هادِفة و شاملة الإرتقاء ذات تطور دائم. شعار دفنشة: التطوير الذاتي للشخص العادي .. التنمية الذاتية, للناس العادية :)

محتوى جديد.

تابعنا على السوشيال

داونلود مجاناً